وايه... غادي نقلب عليكم المواجع في هاد التدوينة بما أن المنتخب لاعب اليوم في العشية، و أيضا بما أننا بلد 40 منيول محلل رياضي ما كاين باس نفهم عليكم تا أنا واحد الشوية واخا ما عمري فايت ليا مدرب بـ380 منيول للشهر.
نبداو بالمدرب، السي البلجيكي بـ380 منيول للشهر ضربوها في 12 شهر هي 4 ملايير و نص في العام، يعني لا طردنا على مّو غادين نخدمو 380 إطار عالي معطل بمنيول للشهر... و لكن خاصنا نتفهمو الوضع! السيد عندو مصاريف كثيرة بحال المسكة الغالية و الماكلة ديال كلبو و لوطيل ديالو و زيد عليه السيليكون اللي دايرو في مخو باش كايخرج بهادوك الخطط الطاكطيكية العبقرية (صدق خاسر و غادي يفتح مخو باش يحيدو) و فلوس الشيشة و الصباغة ديال الشعر و الفياغرا و شلة مصاريف الله يعاونو موحالش واش ﮔـادّينو هادوك الفلوس...
آرا ليا دابا وليداتنا... ويتك ويتك... إفريقيا فيها الصهد يطير الطير و يجي على راسو و هوما غايبين يتدربو في سبنيول... عفوا! غايبين يقصرو في سبنيول (السبنيوليات زينات بنات الكلب كايحشو الركابي)، و الجامعة تاهيا ﮔـالت ليهم ماتعرفوش، آشمنك آ وطيلات واش منك آ كيران واش منك آ شي عجب معرت آش يـﮔـولو ليه... و الناس اللي جايين باغين يلعبو داخلين سوق راسهم و حنا من الباب جايين باغين نربحو الكاس! كاس تاع الرايب واقيلا... وا حتى الكاس تاع الريب مايقدروش عليه، نهار شربو كاس تاع الرايب طاحو كاو واحد جاتو حمى الضيا (جمع ضاية) و لاخر جاتو سريسرة طلا لوطيل و ما فيه، و كون غير ياكلو و تبان عليهم، وا ياكلو ما يشبعو و كل لاعب من الفرقة الاخرى يدير منهم جوج! شوفو التوانسة تبارك الله (التقواس) هاداك عمار الجمل ﮔـدو ﮔـد الجمل، و هاداك المساكني مول المسكة و الديكاباج بقا يشقلب ليا في المدافعين و كركبها للشبكة... ولا هاداك الغابوني مول حسانة "فريريج مارس" الذي تنطبق عليه مقولة الفيلسوف بورﮔـون "تشخ يا الرخ... طاح القفز... وا طار الفرخ وا شد شد! واش غادي نشد؟ وا شد شد!... راه طار و بعد..." و الموصيبة هي اليوم في العشية، ناري آش غايدير لينا موسى معزو!! وا راه كايطير في الجري خاص المدرب (لا شاطت ليه شي حاجة من الخلصة) يشري شي 103 للكوثري و بنعطية باش يشدوه.
ﮔـاع هاد السيبة سبابها الفاسي (من الفساء و ليس فاس) الفهري و رباعتو... مدرب جايبينو بميزانية ديال شركة، مالنا على هاد الحالة؟ و ملي نتا سخي لهاد الدرجة آ خويا جيب نيت شي حد يستاهل واخا يكون بالملاير، جيب ديلبوسكي ولا ريكار ولا ﮔـوارديولا... و لكن مع هاد اللاعبين النزوقيين ماينفعش معاهم المسيح الدجال!! اللي باغي يكون رياضي كايكون منضبط و محافظ على لياقتو (و مبعد من مرتو/صاحبتو شي شهر قبل المنافسة) و يبعد من الشراب و الحشيش و الشيشة و السهير، هادشي كايديروه بزز في نواديهم في الخارج و كايجيو يتفششو علينا هنا.
المهم باراكا عليا ضرتني يدي بالكتبة و النـﮔـير، خليوني نبرد على راسي و نتسنا الخسارة مع النيجر، المشكلة هو ﮔـيريتس ﮔـال لسيدنا "ولادي حرام عليا تانجيب معايا الكاس" ما تجيش غير بقا تما ولا سير نيشان لبلجيكا.
قريت الفقرة االاولى و شفتك كتمعني عليا و انا نحبس درت بناقس. انت مامزيانش ا معلم. انت لا تشجع المواهب الصاعدة في مجال النقد و التحليل الرياضي.
ردحذفتحياتي
طائر البقر
أودي المدرب خاصو يتخلص الخلصة ديال المعلم ديال الإبتدائي، كافياه و قادّاه و فايتاه لهيه.
ردحذفياك مفوبرين عليه بالنقل و المباتة و كولشي، التدريب راه بحالو بحال التدريب فالتكوين المهني و غيرو، غي هو تحت الضو ولوخرين تحت الحارس العام مدير ليسطِيا!